حوكمی به‌كڕیدانی مناره‌ی مزگه‌وته‌كان بۆ بورجی كۆمپانیاكانی مۆبایل

] kurdish – كوردی – كردي [

ده‌سته‌ی به‌شی زمانی كوردی له‌ ماڵپه‌ڕی ئیسلام هاوس

پێداچونه‌وه‌ی: پشتیوان سابیر عه‌زیز

2014 - 1435

 حكم تأجير مآذن المساجد لشركات الاتصالات

« باللغة الكردية »

فريق قسم اللغة الكردية بموقع دار الإسلام

مراجعة: بشتيوان صابر عزيز

2014 - 1435

حوكمی به‌كڕیدانی مناره‌ی مزگه‌وته‌كان بۆ بورجی كۆمپانیاكانی مۆبایل

ئه‌م پرسیاره‌ ئاڕاسته‌ی ماڵپه‌ڕی ئیسلام هاوس كراوه‌ :

پرسیار : ئایا دروسته‌ مناره‌ی مزگه‌وته‌كان به‌كرێ بدرێته‌ یه‌كێك له‌ كۆمپانیاكانی مۆبایل بۆ ئه‌وه‌ی جهازی شه‌به‌كه‌ی كۆمپانیاكه‌یانی له‌سه‌ر دابنێن ؟

وه‌ڵام : سوپاس بۆ خوای گه‌وره‌ ومیهره‌بان، وه‌ درود و صه‌ڵات وسه‌لام له‌سه‌ر محمد المصطفی وئال وبه‌یت ویار ویاوه‌رانی هه‌تا هه‌تایه‌ .

به‌هیچ شێوه‌یه‌ك دروست نییه‌ ناو مزگه‌وت و گۆڕپان و حه‌وشه‌كه‌ی و ئه‌و جێگایانه‌ی كه‌ سه‌ر به‌مزگه‌وته‌ بكرێنه‌ جێگای كڕین و فرۆشتن وبه‌كرێدان به‌ كۆمپانیاكان، یان به‌ كارگه‌ و بانكه‌كان، یان هه‌ر كۆمپانیایه‌كی تر، چونكه‌ مزگه‌وته‌كان له‌ بنه‌ماوه‌ بۆ ئه‌وه‌ دروستكراوون كه‌ جێگای په‌رستن و یاد وذیكری خوای گه‌وره وفێربوونی قورئان و زانست وزانیاریه‌ شه‌رعیه‌كان‌ بن، نه‌ك بكرێنه‌ جێگای بازرگانی وكڕین و فرۆشتن وبه‌كرێدان، خوای گه‌وره‌ش فه‌رموویه‌تی : ▬ وَأَنَّ ٱلۡمَسَٰجِدَ لِلَّهِ فَلَا تَدۡعُواْ مَعَ ٱللَّهِ أَحَدٗا ♂ [ سورة الجن : 18 ] واتا : دڵنیابن که‌: مزگه‌وته‌کان تایبه‌تی خوای گه‌وره‌ن، ده‌بێت هه‌ر ئه‌وه‌ی تێدا بپه‌رسترێت و ناوی که‌سی تر نه‌کرێته‌ شه‌ریك و هاوتای ناوی ئه‌و زاته‌ .

به‌كرێدانی مناره‌ی مزگه‌وت یان گۆڕه‌پان و حه‌وشه‌كانی به‌مه‌به‌ستی بازرگارنی پێوه‌ كردنی له‌گه‌ڵ ئه‌و شیعاره‌ی له‌ ئایه‌ته‌كه‌دا هاتووه‌ یه‌ك ناگرێته‌وه‌، له‌ به‌ر ئه‌وه‌ واجبه‌ مزگه‌وته‌كان به‌دوور بن له‌وه‌ها كارێك، بۆ ئه‌وه‌ی خه‌ڵكی مه‌شغوڵ و سه‌رگه‌رم نه‌بن به‌ غه‌یری عيباده‌ت ویاد وذیكری خواو و پابه‌ندبوون به‌ بیركردنه‌وه‌ له‌ ڕۆژی دوایی و صه‌فای دڵه‌كانه‌وه‌، پێغه‌مبه‌ری خوداش ( صلی الله علیه وسلم ) له‌ فه‌رمووده‌یه‌كدا فه‌رموویه‌تی : (( إنما هي لذكر الله عز وجل والصلاة وقراءة القرآن )) [ أخرجه مسلم ] واتا : مزگه‌وته‌كان ته‌نها بۆ ئه‌وه‌ كراوون كه‌ یاد وذیكری خوای گه‌وره‌ و نوێژ و قورئان خوێندیان تێدا ئه‌نجام بدرێت .

هه‌روه‌ها له‌ فه‌رمووده‌یه‌كی تردا فه‌رموویه‌تی : (( إذا رأيتم من يبيع أو يبتاع في المسجد فقولوا: لا أربح الله تجارتك )) [ أخرجه النسائي والترمذي وحسنه ] واتا : هه‌ركاتێك هه‌ركه‌سێكیتان بینی كڕین و فرۆشتن ده‌كات له‌ناو مزگه‌وتدا ئه‌وه‌ بڵێن : خوای گه‌وره‌ قازانج نه‌خاته‌ بازرگانیه‌كه‌ته‌وه‌ .

دیاره‌ به‌كرێدانی مناره‌ یان گۆڕه‌پان و حه‌وشه‌ی مزگه‌وت به‌شێكه‌ له‌ بازرگانی كردن، ئه‌وه‌ش وه‌ك ئاماژه‌مان پێدا یه‌ك ناگرێته‌وه‌ له‌گه‌ڵ مه‌به‌ستی سه‌ره‌كی‌ بنیات نانی مزگه‌وتدا ..

خوای گه‌وره‌ش زاناتره‌ ..